کراچی — لندن کے لارڈز کرکٹ گراؤنڈ میں انگلینڈ اور آسٹریلیا کے درمیان ایشز سیریز کے دوسرے میچ میں بھی انگلش ٹیم کی روایت سے ہٹ کر کھیل پیش کرنے کی حکمتِ عملی جاری رہی جس پر اب سابق کرکٹرز بھی تنقید کر رہے ہیں۔
ایشز سیریز سے قبل جس بیزبال اسٹرٹیجی کو مبصرین میزبان ٹیم کی طاقت قرار دے رہے تھے آج وہی اسی طریقہ کار کو غیر ذمہ دارانہ اور خودکش کہہ رہے ہیں۔ انگلینڈ کے کامیاب ترین بلے باز ہوں یا سابق کپتان، سب ہی کی رائے میں اگر انگلش کپتان بین اسٹوکس اور کوچ برینڈن مکلم بیز بال کے بجائے تحمل سے آسٹریلیا کے خلاف میچز کھِیلتے تو شاید کینگروز کو سیریز میں برتری حاصل نہ ہوتی۔
آسٹریلیا نے میزبان ٹیم کے خلاف تین سو سے زائد کی برتری حاصل کر لی ہے اور انگلش ٹیم کی مشکلات ختم ہونے کا نام نہیں لے رہیں۔ ایک صفر کے خسارے سے سیریز کا آغاز کرنے والی ٹیم کو دوسرے میچ میں کامیابی کے لیے ذمہ داری سے بیٹنگ کرنا ہوگی جس کی امید سابق کھلاڑیوں کو بہت کم ہے۔
واضح رہے کہ آسٹریلیا کے پہلی اننگز 416 رنز کے جواب میں انگلینڈ کی ٹیم اپنی پہلی اننگز میں 325 رنز بناکر آؤٹ ہوگئی تھی۔ تیسرے دن کھانے کے وقفے سے قبل کے سیشن میں انگلینڈ کے بلے بازوں نے جس طرح بیٹنگ کی اس سے ٹیم کو فائدہ کم اور نقصان زیادہ ہوا، سابق کھلاڑیوں نے اس سیشن میں چھ انگلش کھلاڑیوں کے مل کر صرف 47 رنز بنانے پر تعجب کا اظہار کیا۔
انگلینڈ کے 325 رنز پر ڈھیر ہوجانے کے بعد ٹی وی پر تبصرہ کرتے ہوئے سابق انگلش کپتان ناصر حسین کا کہنا تھا کہ ان دو سیشن میں انگلینڈ کے بلے بازوں کی حکمتِ عملی سمجھ سے باہر تھی۔
ناصر حسین کے بقول ان دونوں سیشن میں انگلینڈ نے غیرذمہ داری کا مظاہرہ کیا، جونی بیئراسٹو اگر صبر و تحمل کا مظاہرہ کرتے تو شاید انگلینڈ کا پہلی اننگز میں اسکور زیادہ ہوتا۔
"When you've got four people out on the hook, the percentages are not in your favour."
— Wisden (@WisdenCricket) June 30, 2023
England's collapse against Australia was down to them moving away from the principles that have served them well, according to Nasser Hussain.#Ashes2023 https://t.co/7oWHf8vW9c
انہوں نے ساتھی کمنٹیٹر مارک ٹیلر کی مثال دیتے ہوئے کہا کہ سابق آسٹریلوی کپتان نے جس طرح کہا تھا کہ کھلاڑی آف اسپنر ٹریوس ہیڈ کی بالنگ پر آؤٹ ہوں گے، ویسے ہی آؤٹ ہوئے اور اس لیے بیزبال انگلینڈ کو کمزور بناتا ہے۔
انہوں نے کھلاڑیوں کے مستقل ہُک شاٹ کھیلنے کو بھی تنقید کا نشانہ بنایا اور تجویز دی کہ ہر بال ہر رن بنانے کے بجائے اگر کنڈیشنز کے مطابق کھیلا جائے تو بہتر ہوگا۔
ناصر حسین کے مطابق انگلینڈ نے پاکستان کے خلاف پاکستان کے گراؤنڈز پر بیزبال کھیل پیش کر کے اس لیے کامیابی سمیٹی کیوں کہ انگلش کھلاڑیوں نے وہاں کی کنڈیشنز کے مطابق کھیلا جب کہ ہوم کنڈیشنز کا وہ فائدہ نہیں اٹھا پارہے۔
ناصر حسین کی رائے سے زیادہ تر انگلش کھلاڑی متفق، سوائے اوئن مورگن کے
جب سے انگلینڈ کے کپتان بین اسٹوکس اور کوچ برینڈن مکلم نے ٹیم کا چارج سنبھالا ہے، انہیں ناکامی کم اور کامیابیاں زیادہ ملی ہیں۔ اور ان کی اسٹرٹیجی کو ب’یزبال’ کا نام دیا گیا ہے۔ اس طرز کی ٹیسٹ کرکٹ میں کھلاڑی ون ڈے کرکٹ کی طرح بیٹنگ کرکے رنز کے انبار لگادیتے ہیں، لیکن پہلے ایشز ٹیسٹ میں شکست کے بعد یہ سحر ٹوٹتا نظر آرہا ہے اور سابق انگلش کرکٹرز نے اس اسٹریٹجی کو ‘پاگل پن’ قرار دینا شروع کردیا ہے۔
معروف کمنٹیٹر اور سابق انگلش کپتان مائیکل ایتھرٹن کے خیال میں انگلش کھلاڑیوں کی بیٹنگ دیکھ کر لگتا ہے جیسے ان کے کنٹرول میں کچھ نہیں۔
سابق انگلش کپتان ایلسٹر کک نے میزبان ٹیم کی بیٹنگ اسٹرٹیجی پر تعجب کا اظہار کرتے ہوئے کہا کہ جب تک کھلاڑی ٹیسٹ میچ میں رنز اور سیشن کی اہمیت کو نہیں سمجھیں گے، وہ اچھی پوزیشن میں آنے کے بعد بھی میچ نہیں جیت سکیں گے۔
Alastair Cook: “There's a sense of shock around the ground".
— Wisden (@WisdenCricket) June 30, 2023
Michael Vaughan: “England clearly like losing".
Was this the passage of play that lost the Ashes?#Ashes2023 https://t.co/bylTsMkf0j
ایک اور انگلش کپتان مائیکل وان کے بقول انگلینڈ کے کھلاڑیوں کو پہلی اننگز میں آسٹریلیا نے آؤٹ نہیں کیا بلکہ بلے بازوں نے تحفے میں اپنی وکٹیں انہیں دیں۔
ادھر معروف کمنٹیٹر اور سابق انگلش کھلاڑی مارک بُچر نے بھی کھلاڑیوں پر الزام لگایا کہ وہ بیزبال کے پیچھے چھپ نہیں سکتے اور جس طرح وہ آؤٹ ہوئے اس کی ذمہ داری ان پر بھی عائد ہوتی ہے۔
ایک پوڈکاسٹ کے دوران میچ پر تبصرہ کرتے ہوئے انہوں نے کہا کہ بلے بازوں کو خود بھی سوچنا چاہیے کہ کیا وہ کوچ و کپتان کی جانب سے دی ہوئی آزادی کا درست استعمال کررہے ہیں یا پھر اسے ضائع کررہے ہیں ۔ پہلی اننگز کے آخر میں جو بھی ہوا اسے دیکھ کر اسٹرٹیجی کا فقدان نظر آرہا ہے۔
"There comes a point where there is a certain responsibility that comes back to you… am I using my freedom wisely or am I just flushing it down the toilet?"@markbutcher72 speaking on England's approach with the bat on last night's Wisden Ashes Daily.#Ashes2023 pic.twitter.com/4AwnMLedHF
— Wisden (@WisdenCricket) June 30, 2023
سابق انگلش کپتان اور مایہ ناز بلے باز کیون پیٹرسن نے تو چوتھے دن کے کھیل سے قبل پیش گوئی کی کہ آسٹریلوی ٹیم اننگز ڈکلیئر نہیں کرے گی اور بیزبال کو چیلنج کرنے کی کوشش کرے گی، وہ بھی ایک ایسے موقع پر جب ان کے فل ٹائم اسپنر نیتھن لائن انجرٖڈ ہیں۔
Kevin Pietersen reckoned Australia won't give England a sniff in Lord's Test.#KevinPietersen #Ashes #ENGvAUS #Ashes2023 #CricketTwitter https://t.co/363h62CRLg
— CricketTimes.com (@CricketTimesHQ) July 1, 2023
فاسٹ بالر و صحافی ڈیریک پرنگل نے بھی بیزبال کی مخالفت کرتے ہوئے کہا کہ اس اسٹریٹجی نے بھلے ٹیسٹ کرکٹ کھیلنے کے طریقے کو بدلا ہوگا لیکن پہلے فیلڈنگ کرکے مخالف ٹیم کو ڈھائی سو سے کم رنز پر آؤٹ نہ کرنا انگلش ٹیم کو مہنگا پڑ سکتا ہے۔
Bazball has changed perceptions of how Test cricket is played but the old saw that if you put a team in you should bowl them out for under 250 has been well and truly ignored…..
— Derek Pringle (@derekpringle) June 28, 2023
اس کے برعکس سابق انگلش کپتان اوئن مورگن بیزبال کے حق میں بول پڑے، ان کے خیال میں انگلینڈ کی ٹیم آسٹریلیا کو صرف اور صرف بیزبال کے ذریعے ہی شکست دے سکتی ہے۔
