آئی پی ایل: چوری شدہ بلوں کی بازیابی پر وارنربھارتی پولیس کے مشکور

کراچی – دنیائے کرکٹ کی سب سے مہنگی اور پرکشش ترین لیگ سمجھی جانے والی انڈین پریمیئر لیگ کے جاری ایڈیشن میں اس وقت کھلبلی مچ گئی جب دو روز قبل خبر سامنے آئی کہ غیر ملکی کھلاڑیوں کی کٹ میں سے قیمتی سامان پر چوروں نے ہاتھ صاف کرلیا۔

گزشتہ ہفتے جب دہلی کی ٹیم بنگلورو سے دہلی میچ کھیلنے آرہی تھی تو کئی کھلاڑیوں کے بلے، گلووز، پیڈز اور دیگر اشیا ٹرانزٹ میں غائب ہوگئے تھے، پولیس کی کوششوں کی وجہ سے زیادہ تر سامان تو واپس مل گیا لیکن آئی پی ایل کی انتظامیہ کو جگ ہنسائی کا سامنا کرنا پڑا۔

تفصیلات کے مطابق آسٹریلیا سے تعلق رکھنے والے ڈیوڈوارنر اور مچل مارش کے ساتھ ساتھ انگلینڈ کے فل سالٹ کے قیمتی بلوں سمیت 16 بیٹ چوری ہوئے تھے۔ کھلاڑیوں کو اپنے سامان کی چوری کا اندازہ اس وقت ہوا جب ان کے پاس کارگو سے کٹ بیگ واپس آئے جس کے فورا بعد انہوں نے انتظامیہ سے اس کی شکایت کی۔

آئی پی ایل انتظامیہ نے مقامی پولیس کے ساتھ مل کر بروقت کارروائی کرکے زیادہ تر سامان تو بازیاب کرالیا، لیکن فی الحال یہ نہیں بتایا کہ اس اس چوری کے پیچھے کس کا ہاتھ تھا، تاہم دہلی کیپٹلز کے کپتان ڈیوڈ وارنر نے سامان کی بازیابی پر انتظامیہ کا شکریہ ادا کیا۔

واقعے کی اپ ڈیٹ دیتے ہوئے ڈیوڈ وارنر نے اپنے انسٹاگرام پر ایک اسٹوری ڈالی جس میں انہوں نے مداحوں کو بتایا کہ کچھ سامان ابھی بھی بازیاب نہیں ہوا لیکن وہ پولیس اور آئی پی ایل انتظامیہ کے مشکور ہیں جس نے کافی سارا چوری ہونے والا سامان برآمد کرلیا۔

David Warner thanks Police for finding the stolen bats, pads, and kit from Delhi Capitals’ transit.

📸: David Warner pic.twitter.com/yuifl6eBQp

— CricAdda x 247 (@Cricadd247) April 21, 2023