گٹکے کے اشتہار میں کام کرنا اکشے کو مہنگا پڑ گیا، مداحوں کی تنقید کے بعد معافی مانگ لی

کراچی — 

دنیا بھر میں فن کارمتعدد برینڈز کے ٹیلی ویژن کمرشلز (ٹی وی سی) میں کام کرکے اپنے مداحوں کو اس برینڈ کی جانب متوجہ کرنے کی کوشش کرتے ہیں لیکن حال ہی میں بالی وڈ اسٹار اکشے کمار کو ایک اشتہار میں کام کرنا مہنگا پڑ گیا۔

اکشے کمار کے چاہنے والے ان کی فٹنس سے بے حد متاثر ہیں لیکن حال ہی میں انہیں ایک گٹکا بنانے والی کمپنی کا اشتہار کرنے پر تنقید کا سامنا کرنا پڑا جس کے بعد انہوں نے اپنے چاہنے والوں سے معافی بھی مانگی۔

اداکار نے حال ہی میں ایک گٹکا کمرشل میں شاہ رخ خان اور اجے دیوگن کے ساتھ کام کیا جس میں تینوں اداکار گٹکے کے استعمال کی تلقین کرتے دکھائی دے رہے ہیں۔

اس اشتہار میں دکھایا گیا ہے کہ بالی وڈ کے کنگ شاہ رخ خان اور اجے دیوگن اپنی گاڑی میں کسی تیسرے شخص سے ملنے جاتے ہیں جس سے ان کی صرف اس لیے دوستی ہوجاتی ہے کیوں کہ وہ بھی ان کی طرح گٹکا کھاتا ہے اور اشتہار میں وہ تیسرا شخص اکشے کمار ہوتا ہے۔

شاہ رخ خان اور اجے دیوگن کے مداحوں کو اس اشتہار پر اس لیے اعتراض نہیں ہوا کیونکہ وہ ماضی میں مضر صحت اشیا کے اشتہار ات میں کام کرچکے ہیں جب کہ اکشے کمار متعدد بار ایسے اشتہارات میں کام کرنے سے انکار کرتے آئے ہیں۔

Canadian #AkshayKumar 3 years back said that he is getting offers from many guthka pan masala companies for marketing their product, but he don’t want to risk the health of people.Today, he joined #VimalPanMasala group along with Drug Accuse Aryan Khan’s Father and Ajay Devgan. pic.twitter.com/NGd2SKNVHM— The Tall Indian (@LiberalAadmi) April 14, 2022

سوشل میڈیا پر وائرل ہونے والی ان کی ایک ویڈیو میں دیکھا جاسکتا ہے کہ وہ 2018 میں ہونے والی ایک تقریب میں اعلان کرتے ہیں کہ انہیں لوگ مضرِ صحت چیزوں کے اشتہارمیں کام کرنے کے لیے منہ مانگی رقم آفر کرتے ہیں، لیکن وہ ہمیشہ انکار کردیتے ہیں۔

اس ویڈیو میں وہ تقریب میں موجود صحافیوں کو بتارہے ہیں کہ نہ تو ان کے پاس پیسے کی کمی ہے اور نہ ہی کام کی، لہذٰا وہ گٹکے کے اشتہار میں کام نہیں کریں گے۔

سوشل میڈیا پر اکشے کمار پر تنقید

اسی لیے جب رواں ماہ ان کا گٹکا کمرشل آن ائیر ہوا تو سوشل میڈیا کے صارفین بھڑک اٹھے، نشہ آور اشیا سے دوری کا درس دینے والے اداکار کو اس کی قربت اتنی مہنگی پڑی کہ ان کے مداح اپنا غصے پر قابو نہ رکھ سکے۔

Selling Nasha to Indian people nd it’s not Pan Masala everything we all know it’s all Gutka what they eat as Ajay Devgan teeth,.as Shahrukh Khan son or himself he says nd Akshay Kumar is not too far behind he can do anything for money pic.twitter.com/G6ZlCshbPG

— Rajesh Arora (@RajeshA89628242) April 20, 2022