اسپورٹس

شاہنواز داہانی کی شان دار بالنگ، ملتان سلطانز نے مسلسل دوسری بار فائنل میں جگہ بنا لی

3 سال ago
98 Views
Written by Omair Alavi

ملتان سلطانز نے وکٹ کیپر محمد رضوان کی کپتانی میں میزبان ٹیم کو 28 رنز سے شکست دے کر دو سال میں دوسرا فائنل کھیلنے کا اعزاز حاصل کیا ہے۔

کراچی — 

پاکستان سپر لیگ (پی ایس ایل) کے ساتویں ایڈیشن میں ملتان سلطانز نے کوالی فائر میچ میں لاہور قلندرز کو ہرا کر ایونٹ کے فائنل میں جگہ بنا لی ہے۔

ملتان سلطانز نے وکٹ کیپر محمد رضوان کی کپتانی میں میزبان ٹیم کو 28 رنز سے شکست دے کر دو سال میں دوسرا فائنل کھیلنے کا اعزاز حاصل کیا ہے۔

لاہور کے قذافی اسٹیڈیم کے کھیلے گئے کوالی فائر میں ایونٹ کی ٹاپ ٹو ٹیمیں آمنے سامنے تھیں۔ لاہور قلندرز کے کپتان شاہین شاہ آفریدی نے ٹاس جیت کر پہلے فیلڈنگ کا فیصلہ کیا تو شائقین کو یہی لگا جیسے ملتان سلطانز کی ٹیم رنز کا پہاڑ کھڑا کرکے مخالف ٹیم کو پریشانی میں ڈال دے گی۔

لیکن دوسرے اوور میں شان مسعود کے دو رنز اور پھر 33 رنز بنانے کے بعد عامر عظمت کے آؤٹ ہوجانے سے ملتان سلطانز کی ٹیم مشکلات کا شکار ہوگئی۔

ایسے میں کپتان محمد رضوان اور رائلی روسو نے ذمے داری سے بیٹنگ کرتے ہوئے تیسری وکٹ کی شراکت میں 113 ناقابلِ شکست رنز بنائے جس کی وجہ سے ٹیم کا اسکور دو وکٹ کے نقصان پر 163 رنز تک پہنچ گیا۔

رائلی روسو نے 42 گیندوں پر 65 ناٹ آؤٹ کی اننگز کھیلی جب کہ محمد رضوان 51 گیندوں پرناقابلِ شکست 53 رنز بنا کر دوسرے نمایاں بلے باز رہے۔

لاہور قلندرز کی جانب سے شاہین آفریدی اور زمان خان کوئی وکٹ نہ لے سکے جب کہ حارث رؤف کو بھی خالی ہاتھ واپس جانا پڑا۔ آؤٹ ہونے والے ایک کھلاڑی کو سمت پٹیل اور ایک کو محمد حفیظ نے آؤٹ کیا۔

جواب میں لاہور قلندرز کا آغاز بھی کچھ مختلف نہ تھا۔ عبداللہ شفیق کے جلد آؤٹ ہو جانے کے بعد فخر زمان کے ساتھ کامران غلام نے اننگز کو سنبھالا لیکن یکے بعد دیگرے کامران غلام، محمد حفیظ اور ہیری بروک کے آؤٹ ہونے کے بعد میزبان ٹیم دباؤ میں آگئی۔

ایک اینڈ سے فخر زمان نے رنز بنانے کا سلسلہ جاری رکھا اور عمران طاہر کے ایک اوور میں 20 رنز بھی اسکور کیے لیکن 63 رنز پر ان کے آؤٹ ہوتے ہی لاہور کی ٹیم بوکھلاہٹ کا شکار ہوگئی اور مقررہ اوورز میں نو وکٹوں کے نقصان پر صرف 135 رنز ہی بنا سکی۔

ملتان سلطانز کی اس شاندار کامیابی میں سب سے بڑا ہاتھ نوجوان فاسٹ بالر شاہنواز داہانی کا تھا جنہیں بالنگ کے لیے کپتان نے 13 اوورز تک انتظار کیا اور جب انہیں گیند دی تو انہوں نے مخالف ٹیم کے مستند بلے بازوں کو واپس پویلین بھیج دیا۔

ایونٹ میں سینچری بنانے والے ہیری بروک ہوں یا گزشتہ میچ کے ہیرو شاہین شاہ آفریدی، شاہنواز داہانی نے چار اوورز میں صرف 19 رنز دے کر تین وکٹیں حاصل کیں۔

یہی نہیں داہانی نے جارح مزاج سمت پٹیل کا مشکل کیچ بھی تھام کر اپنی ٹیم کو میچ میں واپس لانے میں اہم کردار ادا کیا۔ ڈیوڈ ویلی دو، آصف آفریدی، رومان رئیس اور خوشدل شاہ بھی ایک ایک وکٹ کے ساتھ نمایاں رہے۔

اسپورٹس صحافی عالیہ رشید نے ملتان سلطانز کی تعریف کرتے ہوئے اپنے ٹوئٹ میں کہا کہ ” اگر کوئی ٹیم اس بار بھی ٹرافی جیتنے کی حق دار ہے تو وہ ملتان سلطانز ہے۔

ایک اور صحافی فرید خان کا کہنا تھا کہ جس میچ میں شاہین آفریدی یا حارث رؤف وکٹ نہیں لے پاتے اس میں لاہور قلندرز کو شکست ہوتی ہے۔

ایک صارف کا کہنا تھا کہ لاہور قلندرز کی کارکردگی جیسی بھی ہو، کراچی کنگز سے بہتر تھی۔

کسی اور کا ماننا تھا کہ محمد حفیظ کی ہر طرح کی کرکٹ سے ریٹائرمنٹ کا وقت آگیا ہے۔

سابق انگلش اسپنر مونٹی پنیسر نے پاکستان سپر لیگ کی تعریف کرتے ہوئے لاہور میں فل ہاؤس کو ایک اہم سنگ میل قرار دیا۔

یہ پہلا موقع نہیں جب ملتان سلطانز کی ٹیم نے ایونٹ کے فائنل میں جگہ بنائی ہو، گزشتہ برس بھی انہوں نے متحدہ عرب امارات میں کھیلے گئے پی ایس ایل سکس کے باقی ماندہ میچز میں عمدہ کارکردگی دکھاکر فائنل میں جگہ بنائی تھی۔

گزشتہ برس پلے آف مرحلے میں ملتان نے پہلے اسلام آباد یونائیٹڈ کو اور پھر فائنل میں پشاور زلمی کو شکست دے کر پہلی بار ٹرافی اپنے نام کرنے کا اعزاز حاصل کیا تھا۔

اب تک اسلام آباد یونائیٹڈ کے علاوہ کوئی بھی ٹیم پی ایس ایل کی دو بار چیمپئن نہیں بنی ہے۔ لاہور قلندرز کے سوا تمام ٹیمیں کم از کم ایک مرتبہ پی ایس ایل کی ٹرافی جیت چکی ہیں۔

دیگر ٹیموں کی طرح ملتان سلطانز نے پی ایس ایل کے ساتوں سیزن نہیں کھیلے۔ ملتان سلطانز کی ٹیم نے پی ایس ایل تھری میں ڈیبیو کیا تھا اور پی ایس ایل سکس میں فاتح رہی جب کہ ٹیم پی ایس ایل سیون کی فائنلسٹ بن چکی ہے۔

ایونٹ کے کوالی فائر میں شکست کے باوجود لاہور قلندرز کی ٹیم ایونٹ سے باہر نہیں ہوئی۔ اسے فائنل میں جگہ بنانے کے لیے ایک موقع اور ملے گا۔ پشاور زلمی اور اسلام آباد یونائیٹڈ میں سے جو بھی ٹیم جمعرات کو پہلا ایلی منیٹر جیتے گی جمعے کو اس کا مقابلہ لاہور قلندرز سے ہوگا۔

دوسرے ایلی منیٹر میں جو بھی ٹیم جیتے گی 27 فروری کو فائنل میں ملتان سلطانز کا سامنا کرے گی جسے ایونٹ میں اب تک صرف ایک میچ میں شکست ہوئی ہے۔

کیا ملتان سلطانز دو پی ایس ایل ایڈیشن جیتنے والی دوسری ٹیم بن جائے گی؟ یا پھر اسے اس سیزن کی دوسری شکست کا سامناکرنا پڑے گا؟ اس کا فیصلہ 27 فروری کو ہوجائے گا۔

You may also like

About the author

Omair Alavi

عمیر علوی ایک بہت معزز صحافی، تنقید کار اور تبصرہ نگار ہیں جو خبروں، کھیلوں، شوبز، فلم، بلاگ، مضامین، ڈرامہ، جائزوں اور پی ٹی وی ڈرامہ میں مہارت رکھتے ہیں۔ وسیع تجربے اور داستان سوزی کی خصوصیت کے ساتھ، وہ اپنے دلچسپ تجزیوں اور دلکش تقریروں کے ذریعے حاضرین کو مسحور کرتے ہیں۔ ان کی ماہری اور تعاون نے انہیں میڈیا اور تفریحی صنعت کا اہم شخصیت بنا دیا ہے۔

View all posts