مغل برے تھے تو تاج محل گرا دیں: نصیر الدین شاہ کے بیان پر نئی بحث

اگر مغل بادشاہوں کی تعریف نہیں کرسکتے تو تذلیل بھی نہ کریں’

جس ویب سیریز میں نصیر الدین شاہ شہشاہ اکبر کا کردار ادا کررہے ہیں اس میں دکھایا گیا ہے کہ کس طرح ایک بادشاہ کو اپنی سلطنت قائم رکھنے کے لیے اپنے بیٹوں کے درمیان فرق کرنا پڑا تھا۔ اسی سیریز کی پروموشن کے دوران میڈیا سےبات کرتے ان کا کہنا تھا کہ بھارت میں صحت مند بحث کے لیے کوئی جگہ نہ ہونا خطرناک ہے۔

ان کے بقول عقل و سمجھ کی کمی اور تاریخ سے دوری کی وجہ سے بھارتی معاشرے میں جو نفرت پنپ رہی ہے اسی کی وجہ سے موجودہ نسل کے بہت سارے لوگ ہر بری چیز کا الزام آسانی سےگزرے ہوئے زمانے، بالخصوص مغل دور پر ڈال داتے ہیں۔

ان کے خیال میں ان علاقوں کے نام تبدیل کرنا جو مغل دور کی یاد دلاتے تھے، اور دہلی میں موجود مغل گارڈن کانام بدلنا مضحکہ خیز ہے۔ اس سے تاریخ تو نہیں بدلی جاسکتی لیکن اس کے بارے میں نوجوانوں کے ذہن میں غلط تاثر ڈالا جارہا ہے جس سے وہ بالکل خوش نہیں۔

نصیرالدین شاہ کا کہنا تھا کہ جن لوگوں کو مغل شہشاہ اکبر اور افغان حملہ آور نادر شاہ میں فرق نہیں معلوم، ان کی جانب سے اس قسم کے کاموں پر افسوس ہوتا ہے۔ مغل بھارت کو لوٹنے نہیں آئے تھے بلکہ یہاں رہنے آئے تھے اور ان کا بھارت کی ترقی میں کردار کوئی نہیں مٹاسکتا۔

انہوں نے تسلیم کیا کہ تاریخ کی کتابوں میں مغلوں کے دور کی کہیں بے جاتعریف کی گئی ہے جو درست نہیں۔ لیکن اس کا مطلب یہ قطعی نہیں کہ وہ لوگ برے تھے۔ انہوں نے اپنے دور میں جو بھی کیا عوام کے لیے کیا اور اس کا سب سے بڑا ثبوت ان کے دور میں بنائی گئی عمارتیں اور محل ہیں جو آج بھی دنیا بھر میں بھارت کی پہچان ہیں۔

مشہور فلم ‘معصوم’ اور ‘مہرا’ میں اپنی اداکاری سے مداحوں کے دلوں میں گھر کرنے والے نصیرالدین شاہ نے حال ہی میں امت شاہ کو بھی ان کے ایک متنازع بیان پر آڑے ہاتھوں لیا تھا۔

امت شاہ نے بنگلور میں ورکرز کنونشن سے خطاب میں عوام سے استفسار کیا تھا کہ کیا وہ ٹیپو سلطان اور رام مندر بنانے والے نریندر مودی میں سے کس کا ساتھ دیں گے۔

نصیرالدین شاہ کا کہنا تھا کہ نہ صرف یہ موازنہ غلط ہے بلکہ اس پر بات کرنا بھی بے وقوفی ہے۔ ایک ایسا بہادر شخص جس نے برطانوی فوجوں کو بھارت سے بھاگنے پر مجبور کرنے کے لیے اپنی جان دی اس سے کسی کا بھی موازنہ کیا جانا درست نہیں۔

یہ پہلا موقع نہیں جب نصیر الدین شاہ نے اس نوعیت کا کوئی بیان دیا ہے اس سے قبل بھی وہ کئی مرتبہ کہہ چکے ہیں کہ اگر بھارت میں مسلمانوں کے خلاف اسی طرح مہم چلتی رہی تو خانہ جنگی کا خدشہ ہے۔

انہوں نے نہ صرف مودی سرکار کو مسلمانوں کو دوسرے درجے کا شہری بنانے کے ذمہ دار قرار دیا بلکہ انہیں ہر شعبے میں مسلمانوں کی تنزلی کے پیچھے بھی بھارتی حکومت کا ہی ہاتھ نظر آتا ہے۔

لیکن مودی حکومت کے وزرا نصیر الدین شاہ کے بیانات کو رد کرتے ہوئے یہ کہتے رہے ہیں کہ بھارت میں ہر مذہب کے رہنے والے کو مساوی حقوق حاصل ہیں۔

"It is our national custom to laugh at others’ miseries. We can’t laugh at ourselves.”
-Naseeruddin Shah

Thoughts? pic.twitter.com/KGmMpMxeLO

— Som Shekhar (@somshekharsom) February 24, 2023