شوبز

95ویں اکیڈمی ایوارڈز،پاکستانی فلم ‘جوائے لینڈ’ شارٹ لسٹ سے مرکزی لسٹ میں جگہ نہ بناسکی

Written by Omair Alavi

کراچی

95ویں اکیڈمی ایوارڈز کی نامزدگیوں کا اعلان ہوگیا ہے جس میں گزشتہ سال کی کامیاب ترین فلموں میں کام کرنے والے افراد کو نامزد کیا گیا ہے ۔ آسکرز کے نام سے شہرت پانے والا ایوارڈز کا یہ میلہ 12 مارچ کو لاس اینجلس میں سجے گا جس میں فلمی دنیا کے نامور ستارے شرکت کریں گے۔

اس بار اکیڈمی ایوارڈز کی نامزدگیوں میں سب سے آگے سائنس فکشن فلم’ایوری تھنگ ایوری ویئر آل ایٹ ونس’ ہے جس نے 11 نامزدگیوں کے ساتھ میدان مار لیا، جب کہ ‘آل کوائٹ آن دی ویسٹرن فرنٹ’ اور ‘دی بینشیز آف انیشیرن’ کے حصے میں نو نونامزدگیاں آئی ہیں۔

بہترین اداکاروں کی فہرست میں ‘ایلویس’ میں معروف گلوکار ایلویس پریسلی بننے والے آسٹن بٹلر اور ‘بلونڈ’ میں آنجہانی اداکارہ مارلن مونرو کا کردار نبھانے والی آنا ڈی آرمس شامل ہیں جب کہ کیٹ بلینچیٹ کو ‘ٹار’، کولن فیرل کو ‘دی بینشیز آف انیشیرن’ اور برینڈن فریزر کو ‘دی ویل’ کے لیے نامزد کیا گیا۔

پاکستانی شایقین کے لیے بری خبر یہ ہےکہ بہترین انٹرنیشنل فلم کی کیٹگری میں شارٹ لسٹ ہونے والی ہدایتکار صائم صادق کی فلم ‘جوائے لینڈ’ فائنل نامزدگیوں میں جگہ نہ بناسکی۔

اس کیٹگری میں اس کی جگہ جرمن فلم ‘آل کوائٹ آن دی ویسٹرن فرنٹ’، ارجنٹائن کی ‘ارجنٹائن 1985’، بیلجئن فلم ‘کلوز’، پولش فلم ‘ای او ‘اور آئرلینڈ کی ‘دی کوائٹ گرل ‘کو نامزد کیا گیا۔

’دی ممی ‘اسٹار برینڈن فریزر کی شاندار واپسی کا سلسلہ جاری، مارول نے نئی تاریخ رقم کردی!

اس بار اکیڈمی ایوارڈز میں جہاں کئی ایسے اداکاروں کو نامزد کیا گیا جو مسلسل دوسروں سے بہتر کام کرتے آئے ہیں تو وہیں چند ایسے اداکاروں کی بھی واپسی ہوئی جو سنیما کے پردے سےغائب تھے۔

نوے کی دہائی میں ‘دی ممی’ فرانچائزسے شہرت پانے والے اداکار بریڈن فریزر کئی سال فلموں سے آؤٹ تھےلیکن گزشتہ سال ‘دی ویل’ کے ذریعے ان کی سنیما کے پردے پر واپسی ہوئی۔ ان کی جاندار اداکاری کو تو شایقین نے خوب سراہا ہی، اکیڈمی ایوارڈز کی جیوری نے بھی انہیں بہترین اداکارکی کیٹگری میں نامزد کیا۔

کچھ یہی حال سابق چائلڈ اسٹار کے ہوئی کوان کا بھی ہےجنہوں نے ماضی میں ‘انڈیانا جونر’ اور ‘دی گونیز’ میں کام کیا، لیکن پھر اداکاری سے دور چلے گئے تھے۔ گزشتہ سال ‘ایوری تھنگ ایوری ویئر آل ایٹ ونس ‘ میں بہترین معاون اداکاری پر انہیں بھی آسکرز نے نامزد کیا۔

معروف گلوکار ایلویس پریسلے کی بائیوپک ‘ایلویس’ آٹھ، ہدایتکار ‘اسٹیون اسبیلبرگ کی ‘دی فیبلمینز ‘ سات اداکار ٹام کروز کی ایکشن فلم ‘ٹاپ گن ،میورک ‘ چھ اور اور مارول فلم ‘بلیک پینتھر، وکانڈا فارایور’ پانچ کیٹگریوں میں نامزد ہوئی۔

یہ پہلا موقع نہیں جب مارول کامکس کے کردارو ں پر مبنی کسی فلم کو آسکرز میں نامزد کیا گیا ہو، تاہم ‘بلیک پینتھر، وکانڈا فارایور ‘ میں بہترین اداکاری کے لیے اداکارہ اینجلا بیسیٹ کی نامزدگی تاریخی حیثیت کی حامل ہے۔

اس سے قبل کسی بھی اداکار یا اداکارہ کو کسی مارول فلم میں اداکاری پر بہترین اداکار، اداکارہ یا معاون اداکار و اداکارہ کی کیٹگری میں نامزد نہیں کیا گیا۔ 30 سال بعد بہترین معاون اداکاراؤں کی فہرست میں جگہ بناکر سیاہ فا م اداکارہ نے ایک ایسے عہد کی بنیاد رکھی جس سے کامکس کرداروں پر مبنی فلموں کے پروڈیوسروں کا حوصلہ بڑھے گا۔

ویژیول ایفیکٹس کیٹگری میں دی بیٹ مین کا مقابلہ ایواٹار، بلیک پینتھر اور ٹاپ گن کے سیکویلز سے ہوگا

اس بار اکیڈمی ایوارڈز کی بہترین فلم کی کیٹگری میں ایک دو نہیں بلکہ دس فلمیں آمنے سامنے ہوں گی جس میں ‘ایلویس’، ‘ایواٹار، دی وے آف واٹر’، ‘ٹاپ گن ،میورک’، ‘آل کوائٹ آن دی ویسٹرن فرنٹ ‘اور’ایوری تھنگ، ایوری ویئر آل ایٹ ونس ‘ نمایاں ہیں۔

اس وقت باکس آفس پر ریکارڈبنانے والے جیمز کیمرون کی ‘ایواٹار، دی وے آف واٹر ‘ بھی چار کیٹگریوں میں جگہ بنانے میں کامیاب ہوئی جب کہ اتنی ہی نامزدگیاں بریڈ پٹ کی ‘بیبی لون’ اور ‘دی بیٹ مین’ کے حصے میں آئیں۔

بہترین معاون اداکار کی کیٹگری میں جڈ ہرسچ کو ‘دی فیبلمینز ‘ جب کہ ‘ایوری تھنگ ایوری ویئر آل ایٹ ونس ‘ کے لیے معروف اداکارہ جیمی لی کرٹس کو نامزد کیا گیا ہے۔

بہترین ہدایتکار کی کیٹگری میں معروف ہدایتکار اسٹیون اسپیلبرگ کو ‘دی فیبلمینز ‘کے لیے نامزد کیا گیا جب کہ ‘ایوری تھنگ، ایوری ویئر آل ایٹ ونس ‘کے ہدایتکاروں ڈینیئل کوان اور ڈینیئل شینرت اور ‘ٹار ‘کے ٹوڈ فیلڈ بھی اس ریس میں شامل ہیں۔

‘دی فیبلمینز ‘کے لیے نامزد ہونے والے نوے سالہ موسیقار جان ولیمز اس نامزدگی کے ساتھ نہ صرف آسکرز کی تاریخ میں سب سے زیادہ 53 بار نامزد ہونے والے شخص بن گئے بلکہ کسی بھی کیٹگری میں نامزدگی حاصل کرنے والے سب سے عمر رسیدہ فرد بھی بن گئے۔

گزشتہ سال کئی فلموں نے شایقین کو اپنے ویژیول ایفیکٹس سے متاثر کیا لیکن آسکرز میں ‘آل کوائٹ آن دی ویسٹرن فرنٹ ‘ اور ‘دی بیٹ مین ‘ کے ساتھ ساتھ’ایواٹار’، ‘بلیک پینتھر ‘اور ‘ٹاپ گن ‘کے سیکویلز ہی جگہ بنانے میں کامیاب ہوئے۔

بھارتی فلم ‘آر آر آر ‘ کی کامیابیوں کا سلسلہ بھی ابھی جاری ہے۔ فلم کے گانے ‘ناتو ناتو ‘کی نامزدگی اس لیے اہم ہے کیوں کہ اس کے ساتھ ساتھ ‘ٹاپ گن،میورک ‘کا ‘ہولڈ مائی ہینڈ’، ‘بلیک پینتھر وکانڈا فارایور ‘کا ‘لفٹ می اپ ‘اور ‘ایوری تھنگ ایوری ویئر آل ایٹ ونس ‘کا ‘دس از لائف ‘شامل ہیں۔

دیگر کیٹگریوں کی بات کی جائے تو بہترین اوریجنل اسکرین پلے کے ایوارڈ کے لیے ‘دی بینشیز آف انیشیرین’ بھی ہے اور ‘ٹار’ بھی، جب کہ ایڈاپٹڈ اسکرین پلے میں ‘گلاس انین،اے نائیوز آؤٹ مسٹری’ اور ‘ویمن ٹاکنگ’ قابلِ ذکر ہیں۔

اینی میٹڈ فیچر فلموں کی کیٹگری میں ‘پس ان بوٹس، دی لاسٹ وش ‘ہے اور ‘ٹرننگ ریڈ ہیں۔ جب کہ شارٹ اینی میٹڈ فلم کی کیٹگری میں ‘دی فلائنگ سیلر ‘اور ‘آئس مرچنٹس موجودہیں۔

اس سال جن افراد کو اعزازی اکیڈمی ایوارڈ دیا جائے گا ان میں سانگ رائٹر ڈیائن وارن، ہدایتکار پیٹر ویئر اور ہدایتکارہ اوزین پالسی کے نام قابلِ ذکر ہیں۔ جب کہ ‘بیک ٹو دے فیوچر’ میں مرکزی کردار ادا کرنے والے اداکار مائیکل جے فاکس کو جان ہیرشولٹ ہیومن ایٹیرین ایوارڈ سے نوازا جائے گا۔

About the author

Omair Alavi

عمیر علوی ایک بہت معزز صحافی، تنقید کار اور تبصرہ نگار ہیں جو خبروں، کھیلوں، شوبز، فلم، بلاگ، مضامین، ڈرامہ، جائزوں اور پی ٹی وی ڈرامہ میں مہارت رکھتے ہیں۔ وسیع تجربے اور داستان سوزی کی خصوصیت کے ساتھ، وہ اپنے دلچسپ تجزیوں اور دلکش تقریروں کے ذریعے حاضرین کو مسحور کرتے ہیں۔ ان کی ماہری اور تعاون نے انہیں میڈیا اور تفریحی صنعت کا اہم شخصیت بنا دیا ہے۔