خبریں فلمیں

ہالی وڈ اداکار جوناتھن میجرز خاتون پر مبینہ تشدد کے الزام میں گرفتار

Written by Omair Alavi

کراچی — ہالی وڈ کے معروف اداکار جوناتھن میجرز کی دو فلمیں ‘اینٹ مین اینڈ دی واسپ، کوانٹا مینیا’ اور ‘کینگ تھری’ اس وقت باکس آفس پر راج کر رہی ہیں تو ایک مرتبہ پھر وہ خبروں کی زینت بن گئے ہیں، لیکن اس بار کسی فلم کی وجہ سے نہیں بلکہ اپنے رویے کی وجہ سے ایسا ہوا ہے۔

ہفتے کو پولیس نے ماورل سنیما ٹک یونیورس میں کینگ کے کردار سے شہرت پانے والے اداکار کو ایک خاتون کو نہ صرف ہراساں کرنے پر بلکہ ان کا گلا دبانے کی کوشش کے الزام میں گرفتار کیا جو کہ امریکہ میں قانون کے مطابق ‘اسالٹ’ یعنی حملے کے زمرے میں آتا ہے۔

امریکی شہر نیو یارک میں مین ہیٹن کے علاقے چیلسی میں مبینہ طور پر یہ واقعہ پیش آیا جس کے بعد پولیس کو 911 پر شکایت موصول ہوئی تو اس نےکارروائی کرتے ہوئے جوناتھن میجرز کو گرفتار کر لیا جنہوں نے بغیر کسی مزاحمت کے خود کو پولیس کے حوالے کیا۔

نیو یارک پولیس ڈپارٹمنٹ کے مطابق 30 سالہ خاتون نے پولیس کو اس حملے سے آگاہ کیا جس کے بعد 33 سالہ اداکار کو بغیر مزاحمت کے گرفتار کیا گیا۔

حملے کے نتیجے میں خاتون کے سر اور گلے پر زخم آئے۔ انہیں طبی امداد کے لیے قریبی اسپتال منتقل کیا گیا۔


جوناتھن میجرز کے ترجمان کے مطابق جسمانی تشدد کا الزام درست نہیں ہے۔ اداکار نے ایسا کچھ بھی نہیں کیا جس پر انہیں گرفتار کیا جاتا۔

خبر رساں ادارے ‘ایسوسی ایٹڈ پریس’ کو بھیجی گئی ایک ای میل کے مطابق جوناتھن میجرز قانونی طور پر نہ صرف اپنا دفاع کریں گے بلکہ ان کی ٹیم پر امید ہے کہ وہ اس سے بری بھی ہو جائیں گے۔

’اے پی‘ کے مطابق نیو یارک پولیس نے جوناتھن میجرز کو کچھ دیر حراست میں رکھنے کے بعد رہا کردیا تھا۔

جوناتھن میجرز کا شمار ہالی وڈ کے ان ابھرتے ہوئے سیاہ فام اداکاروں میں ہوتا ہے جنہوں نے بہت کم عرصے میں شہرت حاصل کی ہے۔

ان کی دو فلمیں نے رواں سال بیک ٹو بیک نمبر ون پوزیشن پر ڈیبیو کیا جب کہ وہ ٹی وی شو ‘لوکی’ کا بھی حصہ ہیں۔


سن 2019 میں ‘دی لاسٹ بلیک مین ان سان فرانسسکو’ سے ڈیبیو کرنے والےاداکار کی کامیاب فلموں میں
‘دی ہارڈر دے فال’ اور ‘ڈیویشن’ شامل ہیں جب کہ ‘میگزین ڈریمز’ بھی ریلیز کے لیے تیار ہے۔

تاہم ہالی وڈ فلموں پر گہری نظر رکھنے والی ویب سائٹ ’ٹی ایم زیڈ‘ کے مطابق جوناتھن میجرز پر حملے کا الزام لگانے والی خاتون کوئی اور نہیں بلکہ ان کی گرل فرینڈ ہیں جن سے جھگڑے کا آغاز جمعے کی سب ٹیکسی میں سفر کے دوران ہوا تھا۔


’ٹی ایم زیڈ‘ نے پولیس ذرائع کا حوالہ دیتے ہوئے انکشاف کیا کہ بات اس وقت آگے بڑھی جب جوناتھن میجرز نے اپنی گرل فرینڈ کے سامنے ایک دوسری عورت کو ٹیکسٹ میسج کیا۔ جب ان کی گرل فرینڈ نے اداکار کا فون دیکھنے کا تقاضا کیا تو انہوں نے غصے میں آکر پہلے ان کا ہاتھ جھٹکا اور پھر مبینہ طور پر ایک تھپڑ رسید کر دیا۔

اس جھگڑے کے نتیجے میں جوناتھن میجرز کی گرل فرینڈ کے کان کے پچھلے حصے پر زخم آیا ہے جب کہ ان کے چہرے پر بھی نشانات واضح ہیں۔

رپورٹس کے مطابق اس جھگڑے کے بعد ان کی گرل فرینڈ نے 911 سے رابطہ کیا جس پر پولیس نے اداکار کو حراست میں لیا تھا۔

البتہ جوناتھن کے ترجمان جسمانی تشدد کی تردید کر چکے ہیں۔

عمیر علوی – Voice of America

About the author

Omair Alavi

عمیر علوی ایک بہت معزز صحافی، تنقید کار اور تبصرہ نگار ہیں جو خبروں، کھیلوں، شوبز، فلم، بلاگ، مضامین، ڈرامہ، جائزوں اور پی ٹی وی ڈرامہ میں مہارت رکھتے ہیں۔ وسیع تجربے اور داستان سوزی کی خصوصیت کے ساتھ، وہ اپنے دلچسپ تجزیوں اور دلکش تقریروں کے ذریعے حاضرین کو مسحور کرتے ہیں۔ ان کی ماہری اور تعاون نے انہیں میڈیا اور تفریحی صنعت کا اہم شخصیت بنا دیا ہے۔